XOPUREPES

Xopurepe şeni doviqvi mt'k'uri,
Mara, Xopas z'in xolo çkimi guri,
Guri ek z’inşakis var yulun şuri,
Xopurepes vubir xolo Lazuri.

Mu p'a muç'o p'a, mişa medi p'a?
Şur do guri, var gzirae i Xopa?

Xopas ne dixa miğun, ne ğoberi,
Ne oxori, ne tis momatven ç'eri,
Govulur çkva deli devrişi steri,
So gemom3'k'upas, votanap ek seri!

Mu p'a muç'o p'a, mişa medi p'a?
Şur do guri, var gzirae i Xopa?

Nana çkimik ek mibiru on3'elis,
E ç'alimi let’as gyacintu belis,
E oxoris kva ejobdvit temelis,
Xopurepes aya uçkinan mtelis.

Mu bğoda mali, pskidur xalali,
Ginon k'oçi mşini ginon abdali.

Man Lazepe şeni didope m3'iri,
Mu na vort'i, kovore, var viktiri,
Derdi var doskidu ma na var bz'iri,
Xvala dudis var yemixtu inç'iri.

Eti yextasen, k'ata mixtasen,
Let'a çkimişenti kvan3'a iqvasen.

İri Xopurik var mşinaps noseri,
Bazik mşinaps m3ika elapatxeri,
Aşo miğun man igbali gokteri,
Ok’roti xe çkimis nikten noşkeri.

Mitis var uçkin, manti var miçkin,
Mo pskidur man, umuteli dixaş jin.

Dobğuraşi, birapa doskidasen,
Çkimişk'ule coxo çkimi skidasen,
Kimi Xopurik guris memiç'vasen,
Kimi kança, kimik deli mşinasen.

Ne miğun medi, ne mitiş medi,
Xopas z'inşa guri çkimişi gverdi.

Ma ne kança, neti deli var vore,
Ne umuteloba pşinap oncğore,
Halali luk’maş maç’k’omale vore,
Ne kyole vokaçap, ne kyole vore!

Ma aşo vore do paği vore,
Var vimxor, var miç’k’omapun oncğore!

Kamoşalaşi pen3’kaşen ç’uburi,
İmxonan, var ren na eya punt’uri,
Gombundğolu, gemat’u 3aşen kuri,
Mati var vicer, na vort’i Xopuri.

Mtel var gondunun, mtel var ijolen,
Nok’uçxenepe çkimi Xopas koren.

Çkar mutuşa skani-çkimi var matkven,
Ne na renşa mitis mutu manz’inen,
Mu na miğun, iri k’oçepeşi ren,
Ne na renşen mutu gegak’ordinen.

Ena ren koren, xoloti t’asen,
Çkimişk’ulenepekti ixmarasen.

T’anis t’u3a miğunanşa di3xiri,
Kiana vixmart muç’o musafiri,
Ç’umen dudis kemixtanşi inç’iri,
Skani-çkimi dixas geskidun iri.

Mutu var gağen, m3’ule ren let’a,
Çkar mutu var ganç’en tabutiş met’a!

Ora mulun, var iğen a let’ati,
Var doskidun k’oçişi noxvenepeti,
Mara kianas mutu var gyok’ordun,
Muru3xepek varvalasen xoloti.

T’u uçkineli, t’asunon xoloti,
Emus ne Trangi k’atun, ne Ğormoti!

K’oçişen eçkine k’oçepeşi ren,
Eya ne impulen, neti nixiren,
Skidalaşen ekole mutu va ren,
Ren na, xvala veresia medi ren!

Aya aşo ren, iri 3’ori ren,
Em duniaşen na moxtu mi3’vi, mi ren?

Namus p’k’itxa, namu voret noseri?
Kiana dodgimeri ren gokteri,
Didope nciris ret seri-ndğaleri,
Gopucaman, skidut pucepe steri.

Ma memiquci, mo iqven puci!
Ena gibirapes k’ai momçi quci!

Noç’arepe çkimiti çkimi va ren,
K’oçi vore, eyati k’oçişi ren,
Ç’ume ma çkva Lazuri var mabiren,
Ne na ibiranpeşen masiminen.

Çkva mutu var ren, iri diçoden,
Skidalaş ekole skidala va ren!

K’urbeti ma var pşinap a Tbilisi,
Vore nati ma babaşen muflisi,
Skidalaşen ma na manç’enpe ebzdip,
Ma am dunias em duniaş derdi var bzdip!

Kança var vore, ma 3’ori vore,
Oş3’anura çkimişi skiri vore!

Hasani Xelimiş