ONÇAMURE

Ar ç’uç’ut’a memingam sinti ma, onçamure,
Jur k’uçxonepesteri si şuroni çkamu re
Sin gcaxums p’ant’a dingik do çkva şeni ibaxer,
Var gelagişvels mitik, dingik’ala ibaxer.
M3udişi ibaxert tkva xark’işi brincişeni,
Var miçkin mu ganç’enan do ibaxert çkvaşeni.
He brinci skani iven, si xvala nçxvarumt’aşa,
Dinçxvaraşi, çkva nimt’en ç’uvalepeten çkvaşa.
Ne na gejodgin dingis k’ulanişi ren eya,
Neti na xaçku dadis a3’i aç’k’omen eya,
Çkva hemuşi pilavi ağa do beis anç’en,
Dadi çkimis mendrale xvala p’ici a3’k’aren.
Dopstiburt’i, mis uçkin, bort’ik’on-na mat kvaşi,
Mu na en, mus uçkin dingis, xveneri ncaşi!
Si kvaş xveneri re-na, nuxondi dingiş bigas,
Ha3’iti nciris re-na, dişkaşi re, giçkit’as!

Hasani Xelimiş