BOZOPEŞİ NODERİ

Ar yazi rt’u, qonas na vogni yamo,
Mevanç’i noderis do tamo-tamo,
Bozopeşi noderik zop’ont’u yamo,
Hek’o mskva mot t’u hem ndğas heyamo?!
Germak ran3’k’alap’t’u yamoş sersiten,
Ordo molumt’es mtelik bergiten,
Kimi xçe, kimi uça mendiliten,
Nudginan qonas do ibiran yamo.
Qonas ar qucişen voxosart’i ma,
Mteliti mot t’es p’ia hek’o mskva
Mtelis uğut’u txozeri toma,
Vusimin ibirt’u heya yamo.
Ç’umanden limcişa hek komevakti,
Var oxovo3’oni mek’ilu vakti,
Qali kagelaktu yaziş mjorakti,
Hemuşk’ule çkva var vogni yamo.

Hasani Xelimiş