MUXAREBES ĞURELEPE ŞENİ

Lazi nanas çarçafi gotvaleri
Var nant’ret’u dunyaşa o3’k’omilu
Osmanlepeş adetis gegaperi
Mindo vart’u gevoç’k’at’i obiru

Keşamixtes çkin xelabaşi mjora
Kamep’t’k’oçit Osmanlepeş çarçafi
Xeleberi gevoç’k’it didi dulya
Birapeli berepeti vordapt’it

Meğureli Hitlerik duşmanişi
Mjora çkinis uça mp’ula komotu
Kodotgitu t’ibape di3xirişi
Skiri çkimi ek xtimeli var moxtu

Gzas vi3’k’ert’it şkurineri derdoni
Çelamure mixteptes tolepeşen
3’ana nit’u ser-ndğaleri dulyaten
No3in3xale dibğet’u xeepeşen

Aşopeten cengi kodilik’arbu
Mteli skiri ek xtimeli var malu
Lazi nanas nena var dolvak’arbu
Skiri muşi ğureliti dvasağu

E skirepeş noxvemepek otanes
Ser-ndğaleri muç’o mjora do tuta
Xtimeri ndğa var goç’k’ondes mitepes
A3’i irdas feleri muşi mota

Xçe yazmaten ma eya Lazi nana
Elamtis bdgir k’ainobaş bandara
Skanda minon xeleba minon vana
Duşmanepes doubağur ma xvala

Aşopeten derdi mepçi ndğalepes
Dovoxçani di3xironi ğalepe
Fork’a miç’i memskvaneri çitişi
Mevaqoni Lazebura skidişis

NAZİ MEMİŞİŞİ