SARPİ MOLENİ

Sarpi çkinis bulbulepek ibiran
Mis var uz’irun Sarpi moxtan z’iran
Port’uk’aliş limoniş pukirişi
Şurapeş doloxe goxtan do iz’ğan

Sarpi moleni, Sarpi moleni
Pukrinoras skani şuras k’oçi diz’ğeni?
Ha k’olmanis na var ixels diven-i?

Elamtepes mitam k’oçis uz’i3ams
Hak bulbulik pukrinoras ubirams
Çaip’icis dostiberen mzoğa cans
Pukirepeş şuraten ar ixi bars

Sarpi moleni, Sarpi moleni
Pukrinoras skani şuras k’oçi diz’ğeni?
Ha k’olmanis na var ixels diven-i?

K’ulanepek ağne çai 3’ilupan
3’ilupan do Lazuriti ibiran
Ncaşen ncaşa k’vinçepe goputxunan
Ha k’olmanis kva do ncakti ixelan

Sarpi moleni, Sarpi moleni
Pukrinoras skani şuras k’oçi diz’ğeni?
Ha k’olmanis na var ixels diven-i?

Komevaç’vi he Sarpuli k’ulanis
Ma ar fara heya bz’iri do çais
Mskvana muşi muk’oti vom3kva na ğirs
Mendralaşen ma Lazuri gemabirs

Sarpi moleni, Sarpi moleni
Pukrinoras skani şuras k’oçi diz’ğeni?
Ha k’olmanis na var ixels diven-i?

Si ma domç’vi e veraneş k’ulani
Daçxiri ren uça tolepe skani
Si gz’iraşi mu mağoden var miçkin
Mot memilams xe do k’uçxes dermani

Sarpi moleni, Sarpi moleni
Pukrinoras skani şuras k’oçi diz’ğeni?
Ha k’olmanis na var ixels diven-i?

Hasani Xelimiş