MŞKİRİDONİ

Ka’obaten mşkiridoni
Na kçumert’it koxo3’oni
Goputxi, ç’opi k’orğoni
Mo vort’at miti çxeoni

Qinvaş tutapes si var t’i
So goputxi p’ia sort’i
Muten skidi mu imxort’i
Vaşa soti ugyare rt’i.

Si pa3xa var ok’ogixvit
Moxtare yado si dokçvit
Gonç’eleri komomixtit
K’ai re haşo na moxelit

Xolo pa3xa oşenare
Ağne motape ordare
Var şunt’aşa gondunare
Qinvas pa3xa memişkvare

Baba skaniş yeri Faşi
Eya mulun si moxtaşi
Uk’unikten si idaşi
Heti ulun va moxtaşi

Hasani Xelimiş