DESTANİ

Destani p'çarup, ma na moğodu.
Si mot imgar, sevgyuli, mu gağodu?
Skani ustine deloba domağodu,
Soşa vida, aşo qaligelakteri!..

Uskaneli diqu ar dğa ar 3'ana,
Si m3udi gegaqven beki, ma ptkvana,
Domaçodu sap'ri, muç'oşi pçva ma.
Soşa vida, aşo qaligelakteri!..

Ma kagomoç'k'ondu çkva seriş nciri,
Dopxomi, var domiskidu di3xiri,
Çkimiş met'i şeni bz'irop ma iri,
Videlare, gemidvasunonan zenciri.

Si yazis duzepes noderis gulur,
Ma ixi do mexis zuğas movumkur,
Çamlite Faşi do Tunas govulur,
Var nuxondun, guri t'asna demiri.

Na goptit svalepes, pukiri diçanes,
Mşkirdonepek pa3xa dok'ides.
Yuva çkini p'k'idaten, p'ia mundes,
Soşa vidat, xali çkini mu iqvas!..

Hasani Xelimiş