MA Mİ VORE?

3’oxle K’oxa mcoxont’u.
Mevingoni anbani
Mevungapini bigas,
Orağis do k’ardalas.

Jueneçtane vordi
İgiben do xarxalaps,
Na vore ieis vort’i,
Xolo eşo bğarğalap.

Motalepe dovordi,
Ti p’ici, k’uçxe mskvana,
3argvali do kianas
İri xolo namskvanas.

K’iralepestei vort’it,
Gelapxedit tavanis
Dido 3’anei voret
Vimcveli, viağani.

Moras berepe vort’it,
Altuniş mç’ima mç’imt’u.
Ek’o mapape vordi,
Coxope 3aşa kit’u.

Mitik var ok’omirtas
İberia do K’olxa,
Ğoman K’olxa vort’i-na
Andğa İveri vore.

K’ardalas luqustei
Dido giberi vore,
Ğormotişi qoropa,
Şuis ç’areli vore.


YAŞA TANDİLAVA