AR AMBARİ

Nap’a3una nap’a3as
K’idas mç’ita t’alaxi
Ç’alumişi p’ap’a3as
Gagzalen-na amaxti,
Kvaçeçmes do kvamxazis
Kvao3’udes gelaxen,
Mşkeistei p’ap’azi
Ar ambai gi3’umert,
Mututen var egazden
Gogaşinen mcveşepe
Meşagabğen, megagzen:
Laziş coxo mejveles,
Konaç’aes Apxazi,
Emuşk’ule amç’veles
K’iralepes palazi
Coxoşi oktiuten
Mu na iqu z’iriti,
Dağişen gelaxtes do
Çkin voretia z’iriti,
Z’iriti çkin voret do
Tişen k’udelişati,
Dulya var miğunan do,
Xen3’k’el-k’alati vşvati
Ar Sarpi domiskides
Ar mt’k’o uça mzoğaten,
Sum peluk’a,
Sum ç’ino,
Sum suiak’iş mosaten
P’ot’e p’ap’ulik p’ant’a
P’ia ia qviia
Gin3’umers na mok’axta
Şk’as kogulik’iia,
P’ap’uliş ç’it’a mot’a
K’ap’ulas muik’iia,
Emuk emus u3’umers,
K’alati mişviia,
Ek’ule emuk emus.
Si mç’k’idi miç’viia,
Mç’k’idi ç’vei miğun do
A3’i luqu gigibup,
Dudei dolobgibup
Nodeğişa mevulur,
Ç’umen ulun ar dadis,
Ar çkva xolo kobz’irop,
Nobaru-na k’alaşik
Kakalakiş t’ik’ana,
Nisa k’uçxe ktalaşi,
Meç’k’videi biç’epes,
Ginz’e nana-babaşi,
İçk’videi k’vinçepe
Go3’obunan k’aişis,
P’aamiti p’aşui,
Var doskidu ç’urç’ati,
K’oi qona kort’as do
Kogovumer sumk’ati,
Kapşioni mç’k’idi gçap,
Xip’ioni şuk’ati,
P’icis var mogixtu-na,
Ç’it’a cumu uk’ati
M3’k’o imxor-na, m3’k’o ç’k’omi,
Mo giaşk’umer k’urk’ati,
Qoropeli ienan-na
E biç’is keluk’ati,
Ek’ule nanamuşis,
Ambai kagunk’vati;
Ar çkvanestei bzop’on
Lai nena maçoden,
Andğa aşo kort’as do
Kok’ovi3’k’at aşoten
Mu na ginon ia qvi,
Var giğun-na igbali,
Çkva k’aiten viz’iart
Oxoişa vigzalat.


YAŞA TANDİLAVA