Zoğap`icis golacans T`AMT`RAşen SOXUMİşa
Mesvaeli mindilen OÇAMÇİRE POTİşa
SARPİşen MAK`RİYALİ-AZLAĞAşen XOPAşa,
ARKABİ ART`AŞENİ-Vİ3`E DO ATİNAşa.
Ncaepe mui3`ipxen PUKİROBA moxtaşi,
Skindinape muisels dixaş şura goxtaşi.
Xeleba do k`aoba çkar eksiği varaqven
Parpali do but`k`uci pukiris noxedaşi.
Namuk`udgin germapek mç`ima varmek`oçkumers,
Nagonvalas do xon3uk dido nenape tkumers.
Mç`imaş k`ule mjoraten t`aroni gontanaşi,
Dixaş tude ç`k`emepek tiepe kamuşimers.
Meyvape kamuinç`en MAPXAS mjora yextaşi,
Zoğas nadven do iç`ven limcis ga`nt`onet’aşi.
Ç`anda stei şenluği dixvenen k`arta svapes,
Lazepe k`urbetişen LAZONAşa moxtaşi.
Oncere stei nirçen ont`ulepes tipepe.
Kvanç’ala stei irden k`ulanepe biç`epe.
Mjoli,m3xuli,qomuri mteli dixas kodibğen,
Golapes koguşibğen kotume do pucepe.
STVELİ moxtaşi ncapek mteli but`k`a kodobğaps,
Germapes skindinapek oç`k`omale kok`obğaps.
Dulyape koniçoden biyeli noderiten,
Mteli şeyi mskva uğun muç`o CENNETİs mengaps.
K`alaşi kelabarups st`aroşina moxtaşi,
But`k`a let`as komatven ncapeşen kodibğaşi.
Oşvale oç`k`omale mutuş derdi varizden,
Ont`ulepes luqu do zoğas çxomi kort`aşi.
QİNOBAşi tutapes dido didi mtups mtviri,
Odapes kaelobğun k`ak`ali k`ala mtxiri.
Küme k`ala lazut`iş ntxozerepe xaziri,
Şkar şkurina varizden xaros yopşa ren mkiri.
M3xuli do qurz`enişi keladgin p`ek`mezepe,
Ç`uk`iten k`avurmape cumonei çxomepe.
Axiris kelosvarun dişkape do 3xik`epe,
Tipi nçalaş noxveni n3aşa yulun bardepe.
Emtumanepes gedgin qonape do mtxirona,
K`iyanas variz`iren aşo mskva dobadona.
Zoğa k`ala mjoraten muru3xi do tutaten,
Mskva seri ndğaleriten p`ot`es kort`a LAZONA.
Source: Şurimşine
